ЕҰУ КАМПУСЫНЫҢ КЕҢІСТІКТІК ТАЛДАУЫ SPACE SYNTAX ӘДІСІН ҚОЛДАНУ АРҚЫЛЫ

Аңдатпа

Аңдатпа. Университет кампустары оқу ғимараттарын, қоғамдық кеңістіктерді және жаяу жүргіншілер желілерін қамтитын күрделі кеңістіктік жүйелер болып табылады. Кампус ортасының кеңістіктік конфигурациясы қозғалыс сипатына және қолжетімділікке әсер етеді, сондықтан оны талдау сәулет және қала құрылысы зерттеулерінің маңызды бағыты болып табылады.

Бұл зерттеудің мақсаты — Space Syntax әдісін қолдану арқылы Л.Н. Гумилёв атындағы Еуразия ұлттық университеті кампусының кеңістіктік құрылымын талдау және конфигурациялық талдау нәтижелерін нақты жаяу жүргіншілер қозғалысымен салыстыру. Әдістеме аксиалдық талдау мен далалық бақылауларға негізделген. Кампустың аксиалдық картасы DepthmapX бағдарламасы арқылы құрылды. Үш кеңістіктік көрсеткіш есептелді: байланыстылық (connectivity), интеграция (integration) және таңдау (choice), олар маршруттардың қолжетімділігі мен транзиттік маңыздылығын сипаттайды.

Нәтижелер орталық маршруттардың көрсеткіштері жоғары екенін және кампустың кеңістіктік құрылымының негізін құрайтынын көрсетеді. Сонымен қатар, ішінара сәйкессіздіктер анықталды: кейбір төмен интеграцияланған маршруттарда жаяу жүргіншілер белсенділігі жоғары. Алынған нәтижелер кеңістіктік конфигурация қозғалыстың әлеуетін қалыптастыратынын, бірақ пайдаланушылардың мінез-құлқын толық анықтамайтынын көрсетеді. Нәтижелер университет кампустарын жобалау және жаңғыртуда қолданылуы мүмкін.